ഏലസ്സ് ധരിയ്ക്കുന്നത് എന്തിന്?

 

എഴുതി തയ്യാറാക്കിയ മന്ത്രത്തകിട് യഥാവിധി പൂജകൾ ചെയ്തു ശക്തിപ്പെടുത്തി ദേഹത്തു ധരിച്ചാൽ, അത് ധരിയ്ക്കുന്ന ആളിന് ചുറ്റും ഒരു അദൃശ്യമായ മാന്ത്രിക വലയം ഉണ്ടാകുന്നുവെന്നാണ്‌ വിശ്വാസം. ഉരുക്കു പടച്ചട്ട ധരിച്ച ഒരുവന്റെ ദേഹത്തു വെട്ടിയാൽ ശരീരം മുറിപ്പെടുന്നതിനു പകരം വാൾ തെറിച്ചു പോവുകയേ ഒള്ളു. ഇരുമ്പു പടച്ചട്ട ഭൗതിക ശരീരത്തെയാണ് സംരക്ഷിക്കുന്നതെങ്കിൽ മാന്ത്രിക ഏലസ്സ് അതിന്റെ ധർമം നിർവഹിക്കുന്നത് മാനസിക തലത്തിലാണ്. 

മാനസിക തലത്തിൽ ഒരു കവചം രൂപപ്പെടണമെങ്കിൽ മനസ്സ് അതിനു വേണ്ടി ഒരുക്കപ്പെടണം. അതായത് ധൃഢമായ വിശ്വാസം വേണം. ശത്രുക്കൾക്കിടയിലൂടെ കടന്നു പോകുമ്പോൾ ആയുധമോ പരിചയോ കയ്യിലുണ്ടെങ്കിൽ അത് നമ്മുടെ സുരക്ഷിതത്വബോധം വർദ്ധിപ്പിയ്ക്കുന്നു. 

അത് പോലെ തന്നെ അദ്ര്‌ശ്യരായ ശത്രുക്കൾക്കിടയിൽ നമ്മെ കരുത്തുള്ളവരാക്കുന്ന ആയുധമാണ് മാന്ത്രിക ഏലസ്സ്. ദൃഷ്ടി ദോഷങ്ങൾ , അസൂയക്കാരുടെയോ ശത്രുക്കളുടെയോ നാവിൽ നിന്നും തൊടുത്തു വിടുന്ന ശാപോക്തികൾ, ആഭിചാര പ്രയോഗങ്ങൾ, ലക്ഷ്യത്തിൽ എത്തുന്നതിൽ നിന്നും നമ്മെ തടസ്സപ്പെടുത്തുന്ന ദുഷ്ടാത്മാക്കളുടെ പ്രവർത്തനങ്ങൾ എന്നിങ്ങനെ മറഞ്ഞു നിൽക്കുന്ന ഏതു ശത്രുവിൽ നിന്നും സംരക്ഷണം തരുന്ന കവചമാകുന്നു മാന്ത്രിക ഏലസ്സ്.

ഏലസ്സ് സൃഷ്ടിയ്ക്കുന്ന വലയം മറ്റു രീതിയിൽ ഉള്ളതും ആകാം. കാന്തിക വലയത്തിലേക്ക് ഇരുമ്പ് ആകര്ഷിയ്ക്കപ്പെടുന്നു എന്നത് പോലെ വ്യക്തികളെയോ ധനമോ ഭൂമിയോ ഒക്കെ ആകർഷണ യന്ത്രങ്ങൾ എഴിതിയിട്ട ഏലസ്സുകളുടെ വലയങ്ങളിലേയ്ക്കും ആകര്ഷിയ്ക്കപ്പെടുന്നു. ഏലസ്സുകളിൽ എഴുതിയിടുന്ന യന്ത്രങ്ങൾ പല തരം ഉണ്ട്. ഓരോ ആവശ്യങ്ങൾക്ക് അനുസരിച്ചു ഓരോ യന്ത്രവും എഴുതേണ്ട വിധവും മാറിക്കൊണ്ടിരിക്കും. യഥാവിധി പൂജ ചെയ്ത ശേഷം ശരീര ശുദ്ധിയോടെ വേണം ഏലസ്സ് ധരിയ്ക്കാൻ. 

കാലക്രമേണ ഏലസ്സിന്റെ ശക്തിയിൽ കുറവ് സംഭവിയ്ക്കുന്നത് കൊണ്ട് ഇടയ്ക്കിടെ ഏലസ്സ് വീണ്ടും പൂജിയ്ക്കുക എന്നതാണ് വിധി. ഏലസ്സുകൾ സ്വർണത്തിന്റെ വെള്ളിയിലോ തീർത്ത നീണ്ടതോ വൃത്താകൃതിയിലോ ഉള്ള കൂടിൽ ധരിയ്ക്കാവുന്നതാണ്.